காலக் கணிப்பு

காலக் கணிப்பு

 

நில்லாமல் செல்லும் காலம் - நொடி
நிகழ்வுகளில் ஒன்றல் சீலம்
கல்லாமல் கடத்தும் காலம் - அது
கருத்துணர்வில் அழிக்கும் கோலம்
சொல்லாமல் விரையும் காலம் - அது
சுணக்கமிலாச் செயலின் மூலம்
வல்லாண்மை என்னும் காலம் - அதில்
வழுவாமை வெற்றி ஆளும்!

 

காலத்தின் நேர்மை கண்டு - நாம்
கடனாற்றின் நன்மை உண்டு
சீலத்தில் சிறந்தோர் என்போர்ச் - செயும்
சீர்பணி காலம் வெல்லும்
வேல்நுனிக் கூர்மை என்றால் - அதை
வீசுவோன் குறியே நன்றாம்
ஞாலத்தின் வரலாறெல்லாம் - பின்
நடப்போர்க்குப் பாடம் சொல்லும்

 

வளங்களை வகுக்கும் காலம் - ஒரு
வரையறை ஒழுங்கில் நீளும்
களங்களில் பொலிவை ஏற்றும் - அதன்
கதியிலே வளரும் மாற்றம்
காலத்தைச் சோதிடத்தால் - சிலர்
கணிப்பதுகண்கட்டு வித்தை
ஞாலத்தை வென்ற கவிஞன் - ச்சீ
சோதிடந் தனையிகழ் என்றான்!